Náttúrukort

Útivist bætir hressir og kætir

Á Íslandi erum við svo lánsöm að búa í nálægð við náttúruna sama hvar við erum. Góður göngutúr leiðir okkur niður að sjó eða vatni, mólendi eða skógum. Á göngunni getum við andað að okkur fersku loftinu og notið þess sem fyrir augu ber.

Svo virðist sem hugarfarsbreyting sé að eiga sér stað í heiminum og við séum að átta okkur á þeim styrk sem við getum sótt í umhverfi okkar og náttúru. Læknar á Hjaltlandseyjum hafa verið að bjóða sjúklingum upp á náttúrudagatal með hugmyndum að hreyfingu og náttúrupplifun sem meðferðarúrræði og kollegar þeirra í Kanada ávísa á heimsóknir í listasöfn. Japönsk skógarböð hafa einnig fengið aukna athygli en talsmenn þeirra benda á lækningarmátt skóglendis og hvetja til skógarferða til að bæta heilsu og líðan.

Í ljósi alls þessa viljum við því bjóða ykkur upp á 10 hugmyndir fyrir hvern mánuð ársins sem þið getið notað til að styrkja heilsuna og halda góðu jafnvægi.

Njótið náttúrunnar í samræmi við eigin getu – Njótið vel!

Nóvember

Fara í göngu og taka myndir af norðurljósunum þegar þau sýna sig.
Ganga úti og velta fyrir þér gangi himintungla.
Finna hund til að leika við eða kíkja á hvað er að gerast í hesthúsahverfinu.
Skoða hvernig veður er á göngunni. Við hlustum á veðurspár og eigum mörg veðurorð. Hvernig myndir þú lýsa veðri dagsins?
Fara í góðan göngutúr í leiðindaveðri og njóta þess að finna kraftinn í náttúrunni.
Dýfa andlitinu í snjóinn (ef hann snjóar) og taka mynd af farinu sem myndast.
Finna stað úti í náttúrunni sem þú hefur ekki komið á. Einvera getur verið góð fyrir hugann.
Rifja upp álfasögur og kanna álfabyggðir í þínu nærumhverfi.
Rekja minkaslóð eða einhverja aðra slóð sem þú gengur fram á.
Kanna hvaða fuglar eru á ferli. Fölmargar tegundir hafa hér vetursetu.